A Mostra Internacional de Teatro de Ribadavia e o Concello de Ribadavia concedéronlle o Premio de Honra Abrente ao Mérito nas Artes Escénicas á Revista Galega de Teatro e ao programa “Diario Cultural”, da Radio Galega. O premio recoñece o rigor, a constancia e o papel que estes dous medios especializados xogaron ao longo dos anos no proceso de consolidación profesional e artística das artes escénicas galegas.
O acto de entrega tivo lugar o 21 de xullo no salón de plenos do Concello de Ribadavia e contou coas intervencións do director da RGT, Antón Lamapereira e da directora do Diario Cultural, Ana Romaní. A acta do premio distinguiu estes dous espazos como dous sólidos e constantes proxectos como “un esforzado e completo elemento mediador entre a creación, a investigación e os espectadores”. De igual xeito, a acta recolle que tanto o Diario Cultural dende o ámbito público como a RGT dendea vontade asociativa da agrupación Cultural Entre Bambalinas “simbolizan, nas ondas e sobre o papel, o ideal de compromiso coa curiosidade polo diverso e o desexo por normalizar o sector escénico”.
